Tilraun sem mistókst og má ekki endurtaka

„Þetta er tilraun sem mistókst og má ekki endurtaka,“ segir Eiríkur Jónsson, formaður Kennarasambands Íslands, um hugmyndir og þreifingar um nýjan sáttmála á vinnumarkaði.

Aðilar vinnumarkaðarins, almennir og opinberir, ræddu möguleika á samstarfi á fundi í gær. Höfðu Samtök atvinnulífsins frumkvæði að boðun fundarins, sem Magnús Pétursson ríkissáttasemjari stýrði.

Á fundinum lýsti Eiríkur reynslu kennara af stöðugleikasáttmálanum sem undirritaður var sumarið 2009. „Það kemur í ljós að 80 prósent félagsmanna okkar hafa verið án samninga frá miðju síðasta ári og ekki fengið krónu í kauphækkun. Á meðan hafa laun á almenna markaðnum hækkað að meðaltali um sjö til níu prósent. Þess vegna líst mér ekkert á þetta.“

Áformað er að funda á ný eftir tvær vikur. Eiríkur segir óráðið hvort kennarar sæki þann fund. Staðan verði metin í dag. Það hjálpi ekki til að viðsemjendur kennara hjá sveitarfélögunum hafi ekki viljað koma að samningaborðinu vegna mögulegs sáttmála. Þeir hafi viljað bíða og sjá. Slíkt gangi ekki lengur.

Vilhjálmur Egilsson, framkvæmdastjóri Samtaka atvinnulífsins, ítrekar vilja samtakanna til að semja til þriggja ára og skapa með því grundvöll fyrir atvinnulífið að byrja að fjárfesta og ráða fleira fólk í vinnu.

„Það skiptir miklu máli að fyrirtækin geti séð fram í tímann. Öryggi varðandi launakostnað og friður á vinnumarkaði skipta miklu máli.“

Aðspurður kveðst Vilhjálmur líta svo á að kennarar og aðrir opinberir starfsmenn eigi vel heima í breiðu samstarfi á vinnumarkaði þrátt fyrir óánægju með efndir stöðugleikasáttmálans. „Ég get ekki séð að þeir nái frekar árangri án þess að vera samferða öllum hinum.“

Aðkoma ríkisvaldsins er mikilvæg en hún hefur ekki verið rædd að ráði enda vegferðin nýhafin. „Við erum rétt að byrja og eigum eftir að safna því saman sem einstakir aðilar vilja tala um við ríkisvaldið. Það er ekki um það að ræða að skrifa upp á plagg sem ekki er hægt eða vilji til að efna. Það þarf að ganga þannig frá málum að búið sé að afgreiða frumvörp inni í þinginu og taka lokaákvarðanir í málum.“

bjorn@frettabladid.is