Ætlar að stefna Seltjarnarnesbæ vegna eineltis

Ólafur Melsted, framkvæmdastjóri Tækni- og umhverfissviðs hjá Seltjarnarnesbæ, hyggst stefna sveitarfélaginu vegna meints eineltis af hálfu Ásgerðar Halldórsdóttur bæjarstjóra. Þetta staðfestir Ólafur í samtali við fréttastofu.

Ólafur segist hafa fengið munnlega áminningu frá bæjarstjóra í haust vegna meintra brota í starfi. Hann undi ekki áminningunni og gerði athugasemd við bæjarstjóra og bæjarstjórnina með bréfi. Áminningin var síðan dregin til baka. Ólafur fór þá í veikindaorlof og framvísaði læknisvottorði máli sínu til stuðnings. Hann segir að eftir það hafi bæjarstjóri skannað inn læknisvottorðið og sent það á undirmenn Ólafs í tölvupósti. Hann telur að það sé brot á trúnaði við sig og skýrt lögbrot af hálfu bæjarstjórans.

Jóhann Hafstein, lögmaður Ólafs, segir að unnið sé að því að gefa út stefnu á hendur bænum. Hann segir að í því skyni hafi bæjarráði verið sent bréf með ósk um að óháður sálfræðingur og geðlæknir verði fenginn til þess að meta áhrif meints eineltis á líðan ÓIafs. Jóhann segir að fá mál af þessu tagi hafi verið til umfjöllunar hjá dómstólum en hann nefnir sem dæmi mál sem varðaði starfsmenn Veðurstofu Íslands. Fyrir nokkrum misserum stefndi veðurfræðingur þar íslenska ríkinu vegna eineltis af hálfu sviðsstjóra hjá Veðurstofunni og fékk dæmda hálfa milljón í bætur.

Ásgerður Halldórsdóttir vísaði á lögfræðing bæjarins, Óskar Norðmann, þegar haft var samband við hana. Vísir hefur ekki náð tali af Óskari.