Naomi Campell vitnar gegn stríðsherra í Haag

Naomi Campbell var í óvenjulegum aðstæðum í gær þegar hún sat í dómsal Stríðsdómstólsins í Haag. Fyrirsætan þurfti að bera vitni gegn meinta stríðsherranum og demantakónginum Charles Taylor en hún á að hafa fengið blóðdemanta að gjöf frá Taylor árið 1997.

Charles Taylor er ásakaður um stríðsglæpi og mannréttindabrot í Síerra Leóne á tímabilinu 1997-2001 og á að hafa fjármagnað stríðsrektur sinn með svokölluðum blóðdemöntum. Fyrirsætan bar vitni gegn vilja sínum, en hún á að hafa fengið poka fullan af þessum demöntum að gjöf frá Taylor í velgjörðarkvöldverði hjá Nelson Mandela í Suður-Afríku árið 1997. Þessi gjöf Taylors til Campbell er talin vera sönnun þess að hann sé flæktur í ólöglegu demantastarfsemina í Síerra Leóne.

Naomi Campbell var stressuð að sögn viðstaddra er hún mætti í vitnastúkuna en hún var mjög mótfallin því að blandast inn í málið. Hefur hún látið hafa eftir sér í fjölmiðlum að hún sé hrædd um öryggi sitt og fjölskyldu sinnar í kjölfar vitnaleiðslunnar. Taylor var viðstaddur í dómsalnum.

Campbell lét strax í ljós andúð sína á verunni í dómsalnum og sagði við dómarann að hún vildi bara drífa þetta af. Dómarinn mun hafa svarað með kaldhæðni þar sem hún þakkaði Campbell kærlega fyrir að hafa getað fundið sér tíma í annasömu prógrammi til að heiðra þau með nærveru sinni.

Fyrirsætan fór yfir alla söguna bak við gjöfina sem hún á að hafa tekið á móti á hótelherbergi sínu eftir velgjörðarkvöldverðinn. Charles Taylor var meðal gesta í boðinu en Campbell þvertekur fyrir að hafa átt einhver samskipti við hann í boðinu. Segist hún hafa fengið pokann með demöntunum frá starfsmanni hótelsins en að hún hafi ekki kíkt í pokann fyrr en daginn eftir. „Það sem blasti við mér þegar ég opnaði pokann voru pínulitlir skítugir steinar. Mér datt ekki í huga að þetta væru demantar," sagði Campbell við viðstadda í dómsalnum en það var ekki fyrr en hún sýndi vinkonu sinni, leikkonunni Miu Farrow, pokann og innihaldið daginn eftir, að hún uppgötvaði hvers kyns var.

„Farrow skildi strax að þetta var gjöf frá Taylor og hvatti mig því til að skila pokanum þegar í stað og ég lét því vin minn, Jeremy Radcliffe, hafa pokann," sagði Campbell en Farrow var ein af þeim sem lét ákærendur í málinu vita af gjöfinni til Campbell. Charles Taylor neitar öllu en réttarhöldunum yfir honum í Haag er ekki lokið. alfrun@frettabladid.is