Uppsagnir og strætisvagnar seldir verði farið í útboð

„Það er ekki hægt að afgreiða svona tillögur til frekari vinnslu og um leið segja engar kollsteypur fyrirhugaðar," segir Dagur B. Eggertsson, oddviti Samfylkingarinnar í borgarstjórn, sem gefur lítið fyrir yfirlýsingar stjórnarformanns Strætós bs. um tillögur sem fela sér að rekstur á öllum strætisvögnum á höfuðborgarsvæðinu verði boðinn út til einkaaðila. Dagur segir að verði farið í útboð þýði það að strætisvagnarnir verði seldir og auk þess verði öllum vagnstjórum sagt upp.

Jórunn Frímannsdóttir, borgarfulltrúi og stjórnarformaður Strætós bs, sagði í samtali við fréttastofu í dag að ekki standi til að ráðast í róttækar breytingar á rekstri byggðarsamlagsins. Tillögur Par-x viðskiptaráðgjafar IBM sem voru lagðar fram í vikunni séu einungis tillögur. Engin áform séu um að skerða þjónustuna eða segja starfsfólki upp.

„Mér finnst stjórnarformaður Strætó skauta býsna létt fram hjá því að á aðalfundi Sambands samtaka sveitarfélaga á höfuðborgarsvæðinu í gær og ársfundi Strætó voru þessar tillögur Par-x lagðar fram um það að Strætó myndi umbreytast í fyrirtæki sem sæi um útboð á leiðum í stað þess reka vagnanna sjálft," segir Dagur og bætir við að um stórmál sé að ræða. Málið snúi að þjónustu við almenning og starfsöryggi starfsmanna fyrirtækisins. „Það á ekki að umgangast það að léttúð. Síst á tímum eins og við lifum núna."

Dagur segir á fundi Sambands samtaka sveitarfélaga á höfuðborgarsvæðinu í gær hafi borgarstjóra og bæjarstjórunum verið falið að vinna frekar með tillögur Par-x. Þá segir Dagur að sér dugi ekki þau svör eins og veitt hafi verið á fundinum um að ekkert verði ákveðið í þessum efnum fyrr en eftir kosningar á næsta ári.

„Mér finnst mjög mikilvægt að svona ákvarðanir séu ekki teknar án umræðu og frekari rökstuðnings hvað þá í leyni eða þá að menn ætli að skjóta þessu, eins og öðrum ákvörðunum, fram yfir kosningar," segir Dagur.