Jón Þorgrímur: Fínn tími til að fara af kreppuskerinu

Knattspyrnukappinn Jón Þorgrímur Stefánsson hefur ákveðið að leggja skóna á hilluna. Ástæðan fyrir því er sú að Jón er að flytja búferlum til Noregs þar sem hann mun „tölvunördast" fyrir Opera eins og hann orðaði það sjálfur.

„Þessi vinna hefur staðið mér til boða í svona eitt og hálft ár. Ég ákvað að slá til núna. Ólíkt mörgum var ég ekki að missa vinnuna í kreppunni heldur sagði ég upp mjög góðri vinnu til þess að taka þessari. Þetta er annars góður tími til þess að koma sér af kreppuskerinu," sagði Jón Þorgrímur léttur og bætti við að það hefði aldrei farið neitt sérstaklega vel saman að vera tölvunörd og fótboltamaður.

Jón Þorgrímur flytur utan 1. maí næstkomandi en hann mun búa í Osló. Konan hans og þrír drengir koma síðan um tveim vikum síðar.

„Ég ætla sko ekki að spila neinn fótbolta í Noregi. Ég er reyndar ekki enn búinn að jafna mig í löppinni sem ég meiddist á síðasta sumar. Hef verið að fara í bumbubolta og síðan þurft að kæla mig allt kvöldið eftir það," sagði Jón Þorgrímur sem er aðeins 33 ára gamall.

„Eina sem mér finnst leiðinlegt við að hætta núna er að síðasta tímabilið mitt hafi verið eins endasleppt og raun bar vitni. Svo verð ég ekki með nein fráhvarfseinkenni þegar boltinn byrjar í sumar. Þá verð ég bara fyrir framan tölvuskjá í Noregi," sagði Jón Þorgrímur Stefánsson en það verður sannarlega sjónvarsviptir af þeim skrautlega leikmanni úr boltanum.