Niðurskurður í grunnskólum Reykjavíkur

Reykjavíkurborg hefur nú lokið starfs- og fjárhagsáætlunargerð fyrir næsta ár. Menntasviði, sem rekur grunnskóla borgarinnar, var gert að hagræða um 4.1%. Mun meiri hagræðingarkrafa, eða 9% er gerð á miðlæga stjórnsýslu og önnur svið borgarinnar sem annast ýmis konar framkvæmdir, skipulag og umhverfismál. Sparnaður menntasviðs er samt sem áður umtalsverður eða 775 milljónir.

Samfok, samtök foreldra grunnskólabarna í Reykjavík, harma niðurskurð í menntakerfinu. Grunnskólinn gegnir veigamiklu og lögbundnu hlutverki í lífi hvers barns og hefur mikil áhrif á framtíðarmöguleika. Foreldrar eru margir hverjir áhyggjufullir vegna niðurskurðar í grunnskólum. Hvaða áhrif mun þetta hafa á skólastarfið? Mun kennslumagnið skerðast? Verður minni gæsla í frímínútum? Hvað með mötuneyti barnanna? Verður dregið úr stuðningi og sérkennslu? Áhyggjur foreldra eru eðlilegar við þessar kringumstæður. Það er hlutverk þeirra að hugsa fyrst og fremst um velferð barna sinna.

Ákveðið hefur verið að ekki verður skerðing á almennri kennslu, sérkennslu eða nýbúakennslu miðað við árið 2009. Skólarnir búa við ákveðið sjálfstæði og geta því sjálfir ákveðið, upp að vissu marki, hvaða leiðir þeir fara í hagræðingunni. Samfok leggur mikla áherslu á aukna samvinnu við foreldra um samþætt og fjölbreytt nám. Foreldrum er ætlað að hafa áhrif á skólastarfið og þar af leiðandi á hvaða leiðir verða farnar í hagræðingunni. Menntaráð Reykjavíkur samþykkti á fundi sínum í maí sl. að beina því til skólastjóra að hafa ávallt samráð við skólaráð í hverjum skóla um gerð árlegrar starfsáætlunar og rekstaráætlunar.

Skólaráð eru samráðsvettvangur skólastjóra og skólasamfélags um skólahald. Í hverju skólaráði eru tveir fulltrúar foreldra en hlutverk þeirra er að hlusta eftir sjónarmiðum foreldra og bera þau áfram inní skólaráðin. Fjallað er um skólaráðin í grunnskólalögum en þar segir: ,,Skólaráð tekur þátt í stefnumörkun fyrir skólann og mótun sérkenna hans. Skólaráð fjallar um skólanámskrá skólans, árlega starfsáætlun, rekstraráætlun og aðrar áætlanir um skólastarfið. Skólaráð skal fá til umsagnar áætlanir um fyrirhugaðar meiri háttar breytingar á skólahaldi og starfsemi skóla áður en endanleg ákvörðun um þær er tekin. Skólaráð fylgist almennt með öryggi, aðbúnaði og almennri velferð nemenda."

Samfok hvetur foreldra til að standa vörð um réttindi barna til menntunar og þroska. Það er mikilvægt að skólaráð fundi reglulega, t.d. einu sinni í mánuði, og setji síðan fundargerðir á vefsíðu skólanna. Samfok hvetur foreldra til að fylgjast með hvaða leiðir eru farnar í skólum barnanna og kalla eftir þeim upplýsingum ef þær eru ekki fyrir hendi. Foreldrar eru auðlind í skólastarfi og er ætlað að hafa áhrif samkvæmt grunnskólalögum og menntastefnu Reykjavíkurborgar. Íhlutun foreldra á skólastarf eykur vellíðan barnanna, bætir námsárangur og hefur auk þess gríðarmikið forvarnargildi.

Höfundar:

Hildur Björg Hafstein, formaður Samfok

Guðrún Valdimarsdóttir, framkvæmdastjóri Samfok