Sonurinn ók kenndum Sigmundi í þingsal

Sigmundur Ernir Rúnarsson, þingmaður Samfylkingarinnar, viðurkenndi í dag að hafa drukkið áfengi áður en hann tók þátt í umræðum á Alþingi. Forseti Alþingis segir þingmenn bera ábyrgð á sjálfum sér.

DV birtir frétt í dag þar sem haft er eftir ónafngreindum vitnum að Sigmundur Ernir Rúnarsson hafa hellt í sig áfengi í móttöku sem haldin var eftir golfmót MP banka sem Sigmundur tók þátt í síðastliðinn fimmtudag.

Áfengisneysla Sigmundar væri ekki í frásögur færandi nema fyrir það að skömmu síðar tók hann þátt í umræðum um Icesave frumvarpið á Alþingi. Þar þótti framganga hans æði sérkennileg.

Sigmundur sendi svo frá sér yfirlýsingu í dag þar sem hann viðurkennir að hafa drukkið vín umrætt kvöld. Í samtali við fréttastofu sagðist Sigmundur hafa drukkið tvö vínglös í móttökunni hjá MP Banka en ekki kennt áhrifa.

Aðspurður hvort hann hafi svo ekið niður á Alþingi neitaði Sigmundur og sagði son sinn hafa skutlað sér.

Hann segir það hafa verið mistök að mæta á þingið eftir að hafa bragðað áfengi og biðst afsökunar. Hann neitaði að veita fréttastofu viðtal vegna málsins og sagðist vilja bíða eftir því að forsætisnefnd Alþingis fjalli um málið en Ragnheiður Ríkharðsdóttir, þingmaður sjálfstæðisflokksins, ætlar að taka upp málið þar á morgun.

Aðspurður um hvað hann hefði verið að gera í veislu hjá MP banka svaraði Sigmundur því til að hann væri í viðskiptum þar og að þeim sökum verið boðið að taka þátt í golfmóti bankans.

Ásta Ragnheiður Jóhannesdóttir forseti Alþingis baðst undan viðtali í dag en sagði í samtali við fréttastofu að hver þingmaður yrði að bera ábyrgð á sjálfum sér.

Það falli í hlut forseta að halda reglu á þingfundum og hún telji að það hafi hún gert síðastliðið fimmtudagskvöld.