Upphafið að Megan Fox

Þótt einhverjir efist um leiklistarhæfileika Megan Fox hefur hún svo sannarlega stimplað sig inn í kvikmyndabransann með kvikmyndunum um Optimus Prime og hina Transformers-karlana.

Framhaldsmyndin Transformers: Revenge of the Fallen verður frumsýnd í kvikmyndahúsum borgarinnar um helgina og ef hún er eitthvað í líkingu við fyrri myndina ætti hún að trekkja að hasaróð ungmenni sem þyrstir í sprengingar og tæknibrellur. Myndin tekur upp þráðinn þar sem sú fyrri skildi við hann. Sam Witwicky er kominn í háskóla og er í góðu sambandi við bifvélavirkjann Mikaelu Barnes. En smá babb kemur í bátinn þegar Megatron og hans þrjótar snúa aftur til jarðar og reyna að taka Sam til fanga enda veit pilturinn allt um uppruna Transformers. Og sú vitneskja gæti ógnað tilveru þessara geimveruvélmenna. Ekki er að sökum að spyrja, Optimus Prime og félagar snúast til varnar og reyna að bjarga heimsbyggðinni allri frá glötun.

Ekki þarf að fjölyrða um vinsældir fyrstu Transformers-myndarinnar. Hún sló rækilega í gegn enda meistarastykki á sviði tæknibrellna. Myndin markaði jafnframt upphafið að ótrúlegum vinsældum Megan Fox en henni tókst nýverið að verja titil sinn sem kynþokkafyllsta kona heims í augum lesenda karlatímaritsins FHM. Til gamans má geta að Jennifer Lopez var eina konan sem hafði tekist það áður en Fox spratt fram á sjónarsviðið.

Í raun má segja að vinsældir Fox og vinsældir Transformers haldist í hendur. Því fyrir kvikmyndina hafði leikkonan varla gert neitt af viti og á milli Transformers-myndanna tókst Megan Fox ekki að velja sér neitt sérstaklega gáfuleg hlutverk. How to Lose Friends & Alienate People var hálfgert flopp þrátt fyrir veiklulega tilraun markaðskarlanna til að selja kvikmyndina með blautabolssenum leikkonunnar. Um kvikmyndina Whore er lítið vitað, annað en að hún skartar Ron Jeremy í einu hlutverkanna.

Spurningin er hvort Fox hafi leitað til unnusta síns, Brian Austin Green, sem seint verður sakaður um mikla leiklistarhæfileika (hann lék David Silver í 90210-sjónvarpsþáttunum ef einhverjir skildu hafa gleymt því).

Fox hafði reyndar gengið ágætlega að vinna fyrir salti í grautinn með fyrirsætustörfum á unga aldri. Hún hefur unnið í skemmtanaiðnaðinum frá fimm ára aldri og veit því nokkurn vegin út á hvað bransinn gengur.

Hún lék nokkur gestahlutverk í þekktum sjónvarpsþáttum þar vestra og fékk fasta vinnu í sjónvarpsseríunni Hope & Faith sem sýndir var á Íslandi fyrir ekki löngu. Fox dreymdi hins vegar um frægð og frama á hvíta tjaldinu og hefur meðal annars afrekað að leika á móti þremur barnastjörnum sem allar eiga það sameiginlegt að töluvert hefur fallið á stjörnur þeirra. Fox lék nefnilega á móti Olsen-tvíburunum í Holiday in the Sun og svo á móti ólíkindatólinu Lindsay Lohan í Confessions of a Teenage Drama Queen.

Forvitnilegt verður að sjá hvernig Fox tekst að viðhalda vinsældum sínum, nú þegar Transformers-ævintýrinu virðist vera að ljúka. Hún hefur úr nægum verkefnum að moða, vinsældirnar eru ótvíræðar en stóra spurningin hlýtur að vera sú: hvort örlög Fox verði þau að daga uppi og falla í gleymskunnar dá áður en fyrsti áratugur 21. aldarinnar hefur runnið sitt skeið.