Forstjóri Landsvirkjunar: Við brutum ekki lög

Samgönguráðuneytið hefur úrskurðað að Landsvirkjun hafi brotið lög með því að greiða fyrir skipulag vegna virkjana við Neðri-Þjórsá. Forstjóri Landsvirkjunar telur þetta nýja túlkun á lögum.

Samgönguráðuneytið, sem fer með sveitarstjórnarmál, hefur úrskurðað að ákvæði í samningi Landsvirkjunar og Flóahrepps, um að Landsvirkjun borgi skipulag, sé ólögmæt. Einnig að það standist ekki lög að Landsvirkjun standi straum af kostnaði við að gera aðalskipulag.

Aðalskipulagið er á borði umhverfisráðherra og býður staðfestingar.

Málið snýst um þrjár virkjanir sem Landsvirkjun vill gera í Neðri-Þjórsá. Breyta þurfti skipulagi í Flóahreppi vegna fyrirhugaðrar Urriðafossvirkjunar, og í Skeiða- og Gnúpverjahreppi vegna hennar og Holta- og Hvammsvirkjunar.

Arnar Þór Stefánsson, lögmaður landeiganda við Þjórsá, telur að úrskurðurinn feli í sér að umhverfisráðherra verði að synja skipulaginu staðfestingar.

Friðrik Sophusson, forstjóri Landsvirkjunar, kannast ekki við að fyrirtækið hafi brotið lög. Hann segir að sér sýnist sem samgönguráðuneytið komi nú fram með nýja túlkun á lögunum. Fyrirtækið hafi greitt fyrir skipulag til að skipulagsbreytingar væru sveitarfélögum að skaðlausu. Ráðuneytið staðfesti samninginn að öðru leyti, og nú ætti umhverfisráðherra að geta staðfest skipulagið.

Samkvæmt upplýsingum úr umhverfisráðuneytinu, ætlar ráðherra að kalla eftir frekari gögnum um málið, áður en málið verður afgreitt.

Þetta þýðir væntanlega að Landsvirkjun fái endurgreitt frá Flóahreppi, vegna kostnaðar við skipulagið. Upphæðin nemur 6,5 milljónum króna, samkvæmt upplýsingum frá hreppnum.

Samkvæmt samningnum milli hreppsins og Landsvirkjunar, er kveðið á um 40 milljóna króna greiðslu. Margrét Sigurðardóttir, sveitarstjóri, sagðist ekki getað svarað því hvort endurgreiðslan kæmi af þeim peningum.

En málið kynni að vísa út fyrir sig. Fréttastofa Stöðvar 2 hefur upplýst að Landsvirkjun greiddi Skeiða- og Gnúpverjahreppi ellefu milljónir króna, vegna vinnu við aðalskipulag; vegna virkjananna í Neðri-Þjórsá. Í samningi milli Skeiða- og Gnúpverjahrepps og Landsvirkjunar, er jafnframt sambærilegt ákvæði og í samningnum við Flóahrepp, sem úrskurðað var ólögmætt.