Hart tekist á um fundarsköp í þinginu

Ásta Ragnheiður Jóhannesdóttir, þingforseti, áminnti fjóra þingmenn í röð fyrir að tala um annað en fundarstjórn forseta undir samnefndum dagskrárlið þingsins í dag.

Sló Ásta fjölmörg slög í þingklukkuna og bjölluhljóðin ómuðu um þingsalinn, en þetta er ekki í fyrsta sinn sinn sem forseti hefur neyðst til að áminna þingmenn af þessu tilefni.

Fyrst mælti Birgitta Jónsdóttir, þingmaður Borgarahreyfingarinnar, um þörfina á því að innleiða eineltisáætlun í Alþingi, eins og Vísir greindi frá fyrr í dag.

Þá ræddu Birgir Ármannsson og Tryggvi Þór Herbertsson, þingmenn Sjálfstæðisflokksins, um þá ákvörðun að taka Icesave málið úr utanríkis- og efnahags- og skattanefnd í gær.

Truflaði forseti mál Tryggva áður en ræðutíminn var liðinn og benti honum á að nú ætti hann að ræða fundarstjórn forseta og sagði nefndavinnu ekki varða hana.

Síðastur kvað sér hljóðs Guðlaugur Þór Þórðarson, þingmaður Sjálfstæðisflokks, og sagði þörf á að skýra betur við hvaða tilefni væri rétt að koma skilaboðum áleiðis í þinginu.

Guðlaugur fékk fyrir vikið á sig sex bjölluslög, og þurfti þingforseti að benda honum á að þagna þegar hann heyrði í bjöllunni.

„Hversu lengi, virðulegur forseti," spurði Guðlaugur áður en honum var gert að yfirgefa pontu á meðan aðrir þingmenn hlógu að orðaskiptum þingmannsins og forsetans.

Sjá má upptökur af umræðum um fundarstjórn forseta hér.