Bandaríkjamenn reyna að þrýsta á Ísraelsstjórn

George Mitchell, sendifulltrúi Bandaríkjanna í Mið-Austurlöndum, og Robert Gates, varnarmálaráðherra Bandaríkjanna, leggja nú hart að Benjamin Netanjahú, forsætisráðherra Ísraels, og Ehud Barak varnarmálaráðherra um að hefja á ný samningaviðræður við Palestínumenn.

Þeir Mitchell og Gates munu funda stíft með ísraelskum og palestínskum ráðamönnum í vikunni. Einnig hitta þeir ráðamenn í nágrannaríkjunum að máli.

Bandaríkjamenn hafa lagt áherslu á að Ísraelar stöðvi frekari framkvæmdir á landtökusvæðum Ísraela á Vesturbakkanum og í Austur-Jerúsalem. Ísraelsstjórn segir framkvæmdirnar hins vegar lið í „náttúrulegum vexti" landtökusvæðanna.

Bæði Palestínumenn og Arababandalagið hafa sagt að skilyrði þess að viðræður hefjist á ný sé að framkvæmdir á landtökusvæðunum verði stöðvaðar. Bandaríkjamenn hafa tekið undir þá kröfu.

Á fundi með Shimon Peres, forseta Ísraels, sagði Mitchell að Ísraelar gætu bætt andrúmsloftið með því að takast á við erfið deilumál eins og landtökufólkið.

Bæði Vesturbakkinn og Austur-Jerúsalem eru hertekin svæði, sem Ísraelar náðu á sitt vald árið 1967. Ísraelskir landtökumenn á þessum svæðum eru nú orðnir 300 þúsund talsins.