Slökkviliðs- og sjúkraflutningamenn höfnuðu líka kjarasamningum

Slökkviliðs- og sjúkraflutningamenn höfnuðu í dag kjarasamningum sem gerðir voru í sumar með afgerandi meirihluta. Póstatkvæðagreiðsla um framlengingu og breytingar á kjarasamningum sem skrifað var undir í júlí hófst 6. ágúst og lauk í dag.

Þátttaka meðal slökkviliðsmanna var góð, en rúm 70 prósent af 252 á kjörskrá skiluðu atkvæði. Af þeim sögðu 85 prósent nei, en þrettán prósent já, að því er fram kemur á heimasíðu sambandsins.

85 prósent sjúkraflutningamanna höfnuðu einnig samningunum, en fjórtán prósent samþykktu. Um fjörutíu prósent sjúkraflutningamanna skiluðu atkvæði.

Líkt og fram kom á Vísi fyrr í dag hafnaði Landssamband lögreglumanna einnig framlengingu á sínum kjarasamningum í dag.