62 ára gömul móðir varnarmanns ársins í slagsmálum

Arfaslakt gengi meistara Pittsburgh Steelers er farið að hafa áhrif víða. Nú hefur 62 ára gömul móðir James Harrison, varnarmanns liðsins, verið ákærð fyrir árás.

Gamla konan var að horfa á leik Pittsburgh og Cleveland á fimmtudag, sem Steelers tapaði, í félagsheimili nokkru.

Eitthvað virðist hafa komið upp á því allt varð vitlaust á staðnum, menn og konur kýldu frá sér og köstuðu bjórflöskum.

Móðir Harrison ku hafa haft sig mikið frammi en hún var líklega að verja son vegna skítkasts í salnum.

Harrison var valinn varnarmaður ársins í NFL-deildinni í fyrra.