Fyrrum samherjar neita samstarfi við Kristján á Álftanesi

Viðræður um nýjan meirihluta á Álftanesi eru hafnar. Til stendur að þrír fulltrúar Á-lista fari í samstarf við þrjá fulltrúa D-lista. Sjö bæjarfulltrúar eru á Álftanesi og myndi þá einn bæjarfulltrúi standa eftir, Kristján Sveinbjörnsson, sem áður tilheyrði Á-listanum. Guðmundur D. Gunnarsson, oddviti D-listans, staðfestir þetta.

„Bæjarstjórinn boðaði okkur á fund á sunnudagskvöldið til að upplýsa okkur um stöðu mála," segir Guðmundur. Fulltrúar Á- og D-lista funduðu í gærkvöldi þar sem næstu skref voru ákveðin. Sigurður Magnússon, bæjarstjóri Álftaness, fyrir Á-listann, staðfestir að þreifingar hafi verið milli manna um myndun nýs meirihluta.

Ástæðan fyrir þessu er að samgönguráðuneytið komst að þeirri niðurstöðu í síðustu viku að Kristján ætti rétt á því að sitja sem bæjarfulltrúi fyrir Álftanes. Kristján hafði óskað eftir því að draga sig í hlé sem bæjarfulltrúi síðasta vetur, vegna persónulegra ástæðna. Vildi hann snúa aftur í mars en bæjarstjórnin taldi að hann hefði tekið sér ótímabundið leyfi. Vildi Kristján hins vegar meina að leyfi hans hafi verið tímabundið og féllst samgönguráðuneytið á það.

„Þessi úrskurður kom okkur á óvart," segir Sigurður Magnússon. Hann segir bæjarstjórn að sjálfsögðu hlíta úrskurðinum. „Hann kemur hins vegar ekki inn sem fulltrúi Á-lista því við lítum svo á að hann hafi brotið trúnað við okkur bæjarfulltrúana, íbúa Álftaness og kjósendur og kemur hann því inn sem sjálfstæður bæjar­fulltrúi," segir Sigurður.

Fyrir liggur stefna í einkamáli vegna meiðyrðamáls gegn Kristjáni þar sem hann er grunaður um að standa á bak við nafnlausan óhróður um fólk sem hann stóð í lóðadeilum við. Kristján var í 3. sæti á Á-listanum fyrir síðustu kosningar.