Roach: Khan á eftir að klára bardagann með rothöggi

Hnefaleikaþjálfarinn Freddie Roach er sannfærður um að skjólstæðingur sinn Amir Khan eigi eftir að klára titilvarnarbardaga sinn í WBA-léttveltivigt gegn Dmitriy Salita með rothöggi.

Roach hefur reynst nokkuð getspakur til þessa en hann spáði nákvæmlega til um hvenær annar skjólstæðingur sinn Manny Pacquiao myndi klára Ricky Hatton og Oscar De La Hoya og var ekki langt frá því hvenær hann kláraði Miguel Cotto.

„Salita er auðvitað númer eitt á áskorendalistanum en það breytir því ekki að ég er sannfærður um að Khan muni klára bardagann með rothöggi. Ég hef séð Salita æfa og hann er fínn hnefaleikamaður en ekkert frábær og ég er viss um að hann ráði ekki við hraðann hjá Khan," er haft eftir Roach.

Khan hefur klárað 15 af 21 bardaga sínum til þessa með rothöggi en hann mætir Salita í hringnum 5. desember.