Styrkjum konur

Landsnefnd UNIFEM á Íslandi hefur nú verið starfandi í 20 ár. En hvaða erindi skyldu nú íslenskar konur eiga við alþjóðleg samtök eins og Sameinuðu þjóðirnar og hví skyldum við gerast UNIFEM-systur?

Með þátttöku í starfi landsnefndarinnar hérlendis sér maður fljótt að UNIFEM á Íslandi er miklu meira en enn ein hjálparsamtökin. Þessi félagasamtök eru ein af 17 landsnefndum UNIFEM í heiminum, en þetta eru frjáls félagasamtök sem styðja við Kvennasjóð Sameinuðu þjóðanna, UNIFEM. Sá sjóður hefur margsinnis verið útnefndur best rekni þróunarsjóðurinn innan SÞ. Tilvera sjóðsins undir þessum útbreiddu og sýnilegu formerkjum gefur bágstöddum og réttindalitlum konum fyrst og fremst von. Þessi von má ekki slokkna og þess vegna þarf að fylkja liði um að koma til hjálpar og bæta stöðu þessara kvenna. Og það er gott að styrkja konu, því þá styrkjum við heila fjölskyldu.

Síðustu tvö ár hefur markvisst verið safnað hérlendis í Styrktarsjóð UNIFEM til afnáms ofbeldis gegn konum og rann meginhluti þess fjár til stuðnings konum á stríðshrjáðum svæðum í Suður-Súdan, Kongó og Líberíu. Í Líberíu studdi söfnunarféð konur, sem urðu fyrir miklu ofbeldi og nauðgunum á meðan borgarastyrjöld stóð þar yfir í 14 ár. Í Kongó eflir framlagið framfylgni lagasetningar um kynferðisofbeldi en þar hefur ríkt alger lögleysa, ofbeldi og misnotkun. UNIFEM hefur líka sinnt því hlutverki sínu gegnum tíðina að vera málsvari kvenna í þróunarlöndunum og stuðla að viðhorfsbreytingu fólks bæði í þróunarlöndunum sjálfum sem og í þeim samfélögum sem geta komið til hjálpar.

Hér heima fer einnig fram gjöfult og upplýsandi starf og má þar m.a. nefna umræðufundi, undirskriftasöfnun fyrir átakið - Segjum nei við ofbeldi gegn konum - svo eitthvað sé nefnt. Hér söfnuðust 10.000 undirskriftir. Allir slíkir þræðir efla von og styrkja starf í þágu kynsystra okkar, sem hafa því miður hlotið það hlutskipti að líkamar þeirra eru vígvellir í stríðsátökum, skiptimynt í neðanjarðarviðskiptum og mansali og þær réttlausar með öllu. Sem betur fer er hér á landi stór hópur fólks, og ört stækkandi, sem lætur sig varða slíkt óréttlæti.

Höfundur er M.Sc í alþjóðaviðskiptum frá CBS og stjórnarkona í UNIFEM á Íslandi.