Mikið framboð af íbúðahúsnæði veldur þrýstingi til lækkunnar

Hagfræðideild Landsbankans segir að um þessar mundir sé mikið framboð af íbúðahúsnæði og því þrýstingur til frekari lækkunar íbúðaverðs. Þetta kemur fram í Hagsjá deildarinnar þar sem rætt er um vísitölu byggingarkostnaðar.

Vísitala byggingarkostnaðar er mæld með hliðsjón af byggingarkostnaði „vísitöluhúss", fjölbýli í Reykjavík. Samanburður við fjölbýlisþátt vísitölu íbúðaverðs á höfuðborgarsvæðinu frá Fasteignaskrá Íslands gefur því einhverja mynd af arðsemi í byggingariðnaði á höfuðborgarsvæðinu.

Í Hagsjánni segir að eftir kjöraðstæður frá miðju ári 2004 til miðs árs 2006 hafa aðstæður byggingaraðila súrnað töluvert. Byggingarkostnaður hefur rokið upp á sama tíma og íbúðaverð hefur lækkað.

Á meðan arðsemi jókst varð mikil fjárfesting í íbúðahúsnæði. Afleiðing þess er að um þessar mundir er mikið framboð af íbúðahúsnæði og því þrýstingur til frekari lækkunar íbúðaverðs

Byggingarkostnaður hækkaði um 0,65% frá ágúst til september samkvæmt mælingu Hagstofu Íslands. Vísitalan er mæld um miðjan mánuðinn og gildir til verðtryggingar í október. Eins og verið hefur undanfarið eru það efnisliðir sem eru meginvaldar svo mikillar hækkunar en vinnuliðir haldast að þessu sinni óbreyttir annan mánuðinn í röð. Þá hækka opinber gjöld um rúmt prósent.

Þróunin undanfarna tólf mánuði sýnir ennfremur að vinnuliðir draga aftur af hækkun vísitölunnar sem mælist nú 10,6%. Af undirliðum hefur pípulögn hækkað mest undanfarna tólf mánuði, um 28,3%, og dúkalögn þar á eftir, eða um 27,5%. Þetta eru jafnframt þeir liðir sem hækka langmest á milli mánaða í mælingu Hagstofunnar, um 4-5%, meðan aðrir liðir hækka um minna en 1%.