Leikmenn Rauðu Stjörnunnar eiga ekki fyrir mat eða leigu

Ástandið er slæmt hjá fyrrum Evrópumeisturum í Rauðu Stjörnunni frá Belgrad í Serbíu en félagið er heldur betur að verða fyrir barðinu af fjármálakreppunni.

Slóveninn Mirnes Sisic, sem kom til liðsins í janúar, segir leikmenn liðsins ekki eiga lengur fyrir helstu lífsnauðsynjum þar sem að þeir séu ekki að fá borgað frá félaginu.

„Húseigandinn kom til mín fyrr í þessari viku og sagði mér að borga upp þessa þrjá mánuði sem ég skuldaði eða pakka saman og fara," sagði Mirnes Sisic í viðtali við blað í Belgrad.

„Ef að Rauða stjarnan getur ekki látið mig fá pening fyrir leigu, burt sé frá því sem félagið skuldar mér í launum, þá á ég enga kosti nema að fara aftur heim til Slóveníu og flytja aftur inn til pabba og mömmu," sagði Sisic.

„Ég trúi því varla að félag eins og Rauða Stjarnan geti látið svona koma fyrir. Þetta er eins og vera á Titanic. Ungir leikmenn eru síðan í enn verri stöðu og við reynum að láta þá pening svo þeir eigi fyrir næstu máltíð," sagði Sisic.

Rauða Stjarnan varð Evrópumeistari meistaraliða 1991 en auk fjárhagsvandræða þá á félagið einnig í vandræðum með stuðningsmenn sína sem og að liðið er 14 stigum á eftir nágrönnunum í Partizan í deildinni heima fyrir.

Eftir 2-0 tap fyrir Partizan á dögunum kveiktu stuðningsmenn Rauðu Stjörnunnar í sætum á vellinum sem gæti kostað félagið heimaleikjabann eða sektir.