Drekasvæði í Öskjuhlíð

Olíumengun í jarðvegi mun tefja setningu nýs grunnskóla Hjallastefnunnar í Öskjuhlíð, segir Margrét Pála Ólafsdóttir, framkvæmdastjóri Hjallastefnunnar.

Mengunin kom nokkuð á óvart þegar hún fannst, en hún er talin hafa komið frá hersetuliði Breta í seinni heimstyrjöldinni. Unnið var að því með mengunarvörnum borgar­innar og heilbrigðisyfirvöldum að skipta um jarðveg á svæðinu.

„Starfsmenn borgarinnar hlógu mikið að þessu, og kölluðu svæðið Drekasvæðið um tíma,“ segir Margrét Pála. Vonir standa til þess að olía finnist undir hafsbotninum á svokölluðu Drekasvæði, langt norðaustur af landinu.

„Það er bara skemmtilegt að moka burtu gömlum herminjum og setja í staðinn barnaskóla,“ segir Margrét Pála. Setja átti skólann hinn 24. ágúst, en skólasetningu seinkar til 4. september. Samið hefur verið við íþróttafélagið Val um afnot af aðstöðu fyrir nemendur þá daga sem beðið er eftir því að skólabyggingin verði tilbúin.

Skólabyggingin, sem er um 650 fermetrar, hefur þegar verið sett saman og innréttuð á Selfossi, og verður hún flutt á grunninn í sjö hlutum um næstu helgi, segir Margrét Pála.