Framsókn til framtíðar

Stjórnmálaflokkarnir eru ein meginstoð þess lýðræðiskerfis sem við búum við. Því miður hefur það hins vegar gerst á síðustu áratugum að fólk hefur í minna mæli sinnt starfi innan stjórnmálaflokka en áður. Þetta hefur leitt til þess að færri einstaklingar taka ákvarðanir, marka stefnu og velja frambjóðendur en áður var. Áhugi fólks á stjórnmálum hefur samt sem áður ekki minnkað og við breyttar aðstæður í þjóðfélaginu má búast við að fólk hafi meiri tíma og hvata til að taka þátt í stjórnmálastarfi.

Vinnuhópur innan Sambands ungra framsóknarmanna hefur skilað af sér tillögum að framtíðarvinnubrögðum innan Framsóknarflokksins sem bera yfirskriftina „Framsókn til framtíðar". Í tillögum hópsins kemur m.a. fram að breytinga sé þörf á skipulagi stjórnmálaflokka á Íslandi og starfsháttum stjórnmálamanna. Tillögurnar ganga út á að auka lýðræði í Framsóknarflokknum, opna hann, auka sýnileika kjörinna fulltrúa og gera ákvarðanatökuferli enn gagnsærra. Það felast mikil sóknarfæri í skynsamri og öfgalausri stefnu Framsóknarflokksins á næstu árum ef ákveðið er að breyta rétt í samræmi við kröfur grasrótarinnar.

Nú er tækifæri fyrir fólkið í landinu, og þá sérstaklega ungt fólk, til að láta í sér heyra. Taka þátt í pólitísku starfi og tryggja að stjórnmálamenn heyri þeirra raddir. Tækifæri til að endurvekja raunveruleg gildi stjórnmálanna sem eru traust og samvinna milli kjósenda og fulltrúa þeirra.

Framsóknarflokkurinn var stofnaður utan um þær grunnhugsjónir sem drifu áfram samvinnuhreyfinguna og ungmennafélögin. Leitað er lausna á sameiginlegum viðfangsefnum samfélagsins með samvinnu og jöfnuð að leiðarljósi. Við þurfum á tímum sem þessum að leita til þess að endurvekja reisn flokksins með þessi grunnstef í forgrunni enda á frjálslynd félagshyggja ávallt við og hefur ekki beðið skipsbrot eins og þeir ismar sem hafa verið boðaðir á sitt hvorum væng pólitíska litrófsins.

Það er hlutverk SUF sem samvisku flokksins að leiða flokkinn í rétta átt. Sú leið er mörkuð heiðarleika, samvinnu og velferð fyrir hinn almenna borgara.

Taktu ábyrgð á þínu lífi og taktu ábyrgð á framtíð barna þinna. Taktu þátt í uppbyggingarstarfi Framsóknarflokksins. Sameinuð í samvinnu byggjum við upp betra Ísland.

Bryndís er formaður Sambands ungra framsóknarmanna og Eggert er varaformaður Sambands ungra framsóknarmanna.