Sigmundur Davíð: Íslenska þjóðin eins og kúguð fjölskylda

Sigmundur Davíð Gunnlaugsson, formaður Framsóknarflokksins, gagnrýndi sem fyrr Icesave samninginn harðlega í þinginu í dag.

Hann segir óhugsandi að íslenska þjóðin geti staðið undir þeim skuldbindingum sem kveðið er á um í samningnum.

Því til stuðnings tók hann sem dæmi stóra fjölskyldu sem býr saman og borgar hvert öðru fyrir fótanudd, grænmetisrækt og aðra greiða með Matadorpeningum. Þetta sagði hann líkt og hið innra hagkerfi landsins.

Hins vegar þyrftu hjónin sem halda fjölskyldunni uppi að afla fjár til að standa undir miklum skuldum heimilisins og kaupa hluti utan frá.

„Hvað gerist svo þegar einhver fantur kemur og segir: Borgið mér pening?" spurði Sigmundur.

„Hver er þá staðan? Hvernig ætlar þetta heimili að verða sér úti um fleiri íslenskar krónur? Það er alveg sama hvað verður mikið gert með Matadorpeningana, þeir munu ekki duga til að bjarga fjölskyldunni úr þessu ástandi. Fjölskyldan er lent í skuldafangelsi eins og ríkisstjórnin er nú að setja þjóðina í," sagði Sigmundur.

Hann vildi með þessu sýna fram á að jafnvel þó hagvöxtur yrði hér mikill, myndi það ekki hjálpa þjóðinni því skuldirnar eru í erlendri mynt.