Talsmenn neytenda fordæma verðmerkingar

„Ég vil fá þetta burt. Það hefur lengi verið skoðun Neytendasamtakanna að það eigi að banna forverðmerktar vörur. Stærsti ágallinn er sá að þær halda uppi verði. Því fyrr sem þær verða bannaðar, því betra," segir Jóhannes Gunnarsson, formaður Neytendasamtakanna. Gísli Tryggvason, talsmaður neytenda, segir löngu tímabært að stöðva forverðmerkingar á matvöru.

Eins og Fréttablaðið greindi frá í gær rekur Samkeppniseftirlitið nú stjórnsýslumál sem beinast að smásöluverslunum og hópi framleiðenda og birgja í kjötframleiðslu. Rannsóknin miðar að því að leiða í ljós hvort brotið hafi verið gegn samkeppnislögum með forverðmerkingum. Helstu matvörur sem verðmerktar eru með þessum hætti eru unnin kjötvara og ostar. Aðspurður segir Gísli að verðmerking með þessum hætti sé ekki í samræmi við lög.

„Það er löngu tímabært að þetta verði stöðvað." Hann vill árétta að þegar í apríl 2006 hafði hann að eigin frumkvæði samband við Samkeppniseftirlitið og fékk staðfest að skoðun á samræmdri verðlagningu framleiðenda á matvöru væri í gangi.

„Ég lét í ljós þá skoðun mína að málið lyti að broti á samkeppnislögum. Ég taldi þetta skipta máli þar sem ég reyni sem talsmaður neytenda að aðhafast síður í málum ef aðrir, til dæmis til þess bær stjórnvöld, eru að vinna í málinu. Ég lét þó í ljós þá skoðun að forverðmerking hefði mikil áhrif á hegðun matvöruverslana og þar með hagsmuni neytenda."

Jóhannes Gunnarsson telur að forverðmerkingar séu ekki ólöglegar, ólíkt skoðun talsmanns neytenda, Neytendastofu og ASÍ, sem í nýjustu verðkönnun sinni setur fram þá skoðun að forverðmerking sé bönnuð og hamli eðlilegri verðsamkeppni, eins og segir í skýringum við könnunina.

„Ég held að samkeppnisyfirvöld væru ekki að velta vöngum yfir því hvort eigi að stoppa þetta eða ekki, ef þetta væri klárlega bannað. Sé þetta ólöglegt hefði þetta einfaldlega verið bannað fyrir löngu, enda hindrar þetta að fá virka verðsamkeppni á þessar mikilvægu vörur," segir Jóhannes.

SE hefur bent á að tíu til fimm­tán prósent matvöru séu forverðmerkt. Veltan var sjö til tíu milljarðar króna á verðlagi í maí 2008.