Kvótaúthlutun á makríl: Samningsstaða Íslands er óljós

„Ekki er enn ljóst hvort Íslandi verður meinuð þátttaka í fundum hinna strandríkjanna um stjórnun veiða úr makrílstofninum fyrir árið 2010. Þar til þau viður­kenna Ísland sem fullgildan aðila að stjórn veiðanna og réttmæta hlutdeild okkar munum við stunda lögmætar makrílveiðar á okkar forsendum," segir Friðrik J. Arngrímsson, framkvæmdastjóri LÍÚ, í niðurlagi greinar sem birtist í Fiskifréttum í gær.

Friðrik segir Norðmönnum, Færeyingum og ESB bera skylda til að semja við Íslendinga um stjórn makrílveiðanna samkvæmt Hafréttarsáttmála Sameinuðu þjóðanna og Úthafsveiðisamningnum. „Norðmenn og ESB hafa með órétti útilokað okkur frá þátttöku í stjórn veiða úr makrílstofninum í meira en áratug," segir hann í greininni.