McManus og Hutton klárir í slaginn

Þeir Stephen McManus, fyrirliði Celtic, og Alan Hutton, varnarmaður Tottenham, eru sagðir klárir í slaginn fyrir leik Skota og Íslendinga á morgun.

McManus missti af leik Skota gegn Hollandi vegna ökklameiðsla en Hutton kom inn á sem varamaður í leiknum. Hann hefur verið frá í fjóra mánuði en þetta var hans fyrsti alvöru leikur síðan í desember síðastliðnum.

Talið er líklegt að McManus leiki við hlið Colin Caldwell í vörninni og að Hutton fari í stöðu hægri bakvarðar í stað Graham Alexander. Gary Naysmith verði sem fyrr í stöðu vinstri bakvarðar en Cristophe Berra verði settur á bekkinn.

„McManus vill ólmur spila og við erum bjartsýnir," sagði Terry Butcher, aðstoðarlandslðsþjálfari Skota, við skoska fjölmiðla. „Það eru góðir möguleikar á að hann spili en við munum sjá til hvernig gengur á æfingum."

„Það var frábært að fá Hutton inn í leikinn gegn Hollandi og stór plús," sagði Butcher. Hann sagðist enn fremur ekki vita til þess að Harry Redknapp, stjóri Tottenham, væri mótfallinn því að Hutton myndi spila í leiknum.