Laudrup rekinn frá Spartak Moskvu

Spartak Moskva í Rússlandi hefur rekið Danann Michael Laudrup úr starfi knattspyrnustjóra félagsins eftir aðeins sjö mánuði í starfi.

Spartak hefur byrjað illa á nýju tímabili undir stjórn Laudrup og aðeins unnið einn leik í fyrstu fjórum leikjunum.

Liðið tapaði, 3-0, fyrir erkifjendunum í Dinamo Moskvu í bikarnum í gærkvöldi og innsiglaði það örlög Laudrup. Þetta var staðfest á heimasíðu félagsins í dag.

Laudrup er 44 ára og hefur áður þjálfað Bröndby í Danmörku og Getafe á Spáni. Hann var einnig aðstoðarlandsliðsþjálfari Dana um tíma.