Djurgården ekki búið að hafa samband

Rúnar Kristinsson, yfirmaður knattspyrnumála hjá KR, segir að sænska úrvalsdeildarfélagið Djurgården sé ekki búið að hafa samband við KR vegna Guðrúnar Sóleyjar Gunnarsdóttur.

„Mér skilst að Djurgården ætlaði að setja sig í samband við KR í dag en síðast þegar ég vissi höfðum við ekkert heyrt. En miðað við hvað við höfum heyrt eigum við von á því að Svíarnir hafi samband," sagði Rúnar.

Guðrún Sóley hélt í morgun til Svíþjóðar þar sem henni stendur til boða að spila með Djurgården á næsta keppnistímabili. Félagið þarf þó fyrst að ná samningum við KR um félagaskipti leikmannsins.

Fyrir skömmu samdi Guðbjörg Gunnarsdóttir, markvörður hjá Val, um að ganga til liðs við Djurgården.