Hænsnakastarinn fær tvær milljónir frá Romario

Brasilísku knattspyrnugoðsögninni Romario var í dag gert að greiða stuðningsmanni Fluminese tvær milljónir króna í miskabætur fyrir að hafa lamið hann fyrir sex árum síðan.

Stuðningsmaðurinn var mjög ósattur við gengi liðsins á sínum tíma og kastaði sex hænsnum í átt að leikmönnum á æfingasvæði Fluminese.

Romario brást við hinn versti, elti manninn uppi og lét högg og spörk dynja á honum ásamt einum af þjálfurum liðsins.

Maðurinn fór með málið í réttarsalinn á sínum tíma og voru dæmdar fyrrgreindar miskabætur, en málinu var áfrýjað.

Niðurstaðan var sú sama að þessu sinni og því þarf framherjinn skapheiti að greiða hænsnabóndanum tvær milljónir króna.