Flugumferðarstjórar undrast ákvörðun samgönguráðherra

Stjórn Félags íslenskra flugumferðarstjóra undrast að Kristján L. Möller samgönguráðherra skuli tilkynna fyrirvaralaust, án nokkurs samráðs við starfsfólk sem hlut á að máli, að ekkert verði af fyrirhuguðum flutningi flugleiðsöguþjónustu á Keflavíkurflugvelli til Flugstoða ohf. núna um áramótin. Þetta kemur fram í tilkynningu sem stjórn félagsins hefur sent fjölmiðlum.

Flugumferðarstjórar á Keflavíkurflugvelli, sem eru starfsmenn Flugmálastjórnar Keflavíkur-flugvallar, segjast hafa fengið bréf, í september síðastliðnum, um að störf þeirra yrðu lögð niður og Flugstoðir ohf. tækju við ráðningarsamningi þeirra í ársbyrjun 2009.

Stjórn Félags íslenskra flugumferðarstjóra segist líta svo á að flugumferðarstjórar á Keflavíkur-flugvelli hafi með umræddri tilkynningu í raun verið ráðnir til Flugstoða og að þeir verði starfsmenn Flugstoða frá og með 1. janúar 2009. Af því leiði að engir flugumferðarstjórar verði starfandi á vegum Keflavíkurflugvallar ohf., hins opinbera hlutafélags sem tekur á nýársdag formlega við þeim rekstri sem áður heyrði undir Flugmálastjórn Keflavíkurflugvallar og Flugstöð Leifs Eiríkssonar ohf.