Jón Kristinn Cortez tónlistarkennari og kórstjóri var við tónleikahald í Fríkirkjunni í Reykjavík á sunnudag. Á meðan tónleikahaldinu stóð var bílnum hans stolið. Þetta gerðist á milli klukkan 17:00 og 18:00.
Um er að ræða fallegan silfurgráan jeppa að sögn Jóns. Billinn sem er af gerðinni Hyundai Galloper er með númerið OH 818.
„Eftir að ég hafði tilkynnt lögreglunni það formlega kom í ljós að ekki yrði leitað að honum, til þess væri enginn mannskapur, en ef hann yrði stöðvaður við venjubundið eftirlit myndi koma upp í tölvu lögreglunnar að hann væri eftirlýstur," segir Jón Kristinn í tölvupósti sem hann sendi á vini og vandamenn og barst Vísi.
Jón biður fólk að láta sig vita ef einhver rekst á bílinn. „Ef hann er í umferðinni sker hann sig úr vegna þess að aðalljósin eru gul, einn mjög fárra bíla. Svo ef þið sjáið gul ljós í umferðinni þá athugið hvort þar sé jeppi, Galloper OH 818 og látið vita af því hjá lögreglunni í 112."
Jón segir að bíllinn gæti svosem líka verið einn og yfirgefinn í einhverri íbúðargötu eða hliðargötu. „Eða á bílaplani og gildir þá það sama, látið lögregluna vita. Eða mig."
Hægt er að ná sambandi við Jón Kristinn í síma 693-3922.
