Víða hálka, él og lítið ferðaveður

Ófært er um Fjarðarheiði og allur mokstur hættur þar í kvöld, segir í tilkynningu frá Vegagerðinni. Þá er greint frá hálku og skafrenningi á Holtavörðuheiði og hálkublettum á Bröttubrekku.

Á Vestfjörðum eru hálkublettir og skafrenningur á Steingrímsfjarðarheiði. Snjóþekja er yfir Eyrarfjall. Hálkublettir eru á Klettshálsi, einnig eru hálkublettir á Hrafnseyrarheiði og á Ströndum.

Á Norðurlandi er hálka og skafrenningur á Þverárfjalli. Hálka og krapi er á milli Hofsóss og Siglufjarðar. Hálka er á Lágheiði.

Á Norð-Austurlandi er mjög mikil hálka eða snjóþekja, éljagangur og skafrenningur. Varað er við óveðri á Mývatnsöræfum og mjög slæmri færð. Þæfingur er á Hólasandi og á milli Raufarhafnar og Þórshafnar. Á Austurlandi er þungfært og stórhríð á Möðrudalsöræfum, þungfært og skafrenningur er á Vopnafjarðarheiði og ekkert ferðaverður á þessum leiðum.

Þæfingur er Sandvíkurheiði. Snjóþekja, skafrenningur og óveður er á Fagradal. Hálkublettir og skafrenningur er á Oddskarði. Þungfært er á Breiðdalsheiði og ófært er yfir Öxi, Hellisheiði eystri og Vatnsskarð eystra.

Á Suð-Austurlandi er víðast hvar greiðfærir fyrir utan sandfok á Mýrdalssandi og óveður er undir Eyjafjöllum.

Vegna hættu á slitlagsskemmdum eru þungatakmarkanir víða og eru flutningsaðilar beðnir að kynna sér það nánar í síma 1777. Vegna framkvæmda á Hringvegi 1 í Borgarnesi er umferð beint um hjáleið. Vegfarendur eru beðnir að sýna aðgát og tillitsemi. Einnig er unnið við slitlagsviðgerðir í Norðurárdal og á Borgarfjarðarbraut og þar er hætta á grjótkasti.

Vegagerðin minnir vegfarendur á að vegna framkvæmda við tvöföldun Reykjanesbrautar er nauðsynlegt að sýna þar aðgát. Sérstaklega er fólk beðið að fara varlega við framhjáhlaup við Voga, Grindavíkurveg og Njarðvík. Mikilvægt er að virða hraðatakmarkanir.