Árás Jóns Trausta á Pólverja ekki kærð

Fáfnismaðurinn Jón Trausti Lúthersson var ekki ákærður fyrir að ráðast á Pólverja á veitingastað í Reykjanesbæ sama kvöld og hann framdi tvær líkamsárásir sem hann var dæmdur fyrir í gær. Fulltrúi lögreglustjórans á Suðurnesjum segir að kæra hafi ekki borist frá pólverjanum.

Jón Trausti hefur hafið afplánun fyrir aðra líkamsárás.

"Það kemur fram í dómnum að samkvæmt vitni hafi Jón Trausti ráðist á Pólverja fyrr um kvöldið en okkur barst ekki nein kæra út af því," segir Júlíus Magnússon, fulltrúi Lögreglustjóra hjá Lögreglunni á Suðurnesjum.

Í dómnum heldur vitni því fram að Jón Trausti hafi barið Pólverjann með glerglasi í höfuðið, lögreglumaður hafi komið á vettvang og fylgt Pólverjanum burt.

Stuttu eftir þetta atvik gekk Jón Trausti í skrokk á konu á efri hæð staðarins þar sem um fimmtán leðurklæddir meðlimir Fáfnis klúbbsins sátu að sumbli. Um nóttina skallaði Jón Trausti svo mann í höfuðið inn á veitingastaðnum og nefbraut hann.

Jón Trausti var dæmdur í fimm mánaða fangelsi fyrir síðari tvær árásárnir en árásin á Pólverjann virðist óupplýst.

"Ef okkur berst ekki kæra er ekkert sem við getum gert," segir Júlíus. Spurður hvort lögreglumaðurinn sem sagður er hafa mætt á vettvang hafi ekki átt að gera skýrslu um málið eða grípa til aðgerða segir Júlíus:

"Þetta með Pólverjann er byggt á frásögn eins vitnis og erfitt að greina hvort það sé satt og rétt.

Jón Trausti situr nú í fangelsi vegna eldri líkamsárásar. Hann gekk í skrokk á manni skammt frá félagsheimili Fáfnis í miðbænum og meig yfir hann. Jón Trausti er einnig þekktur fyrir tengsl sín við glæpasamtökin Hells Angels.