Vilja að Kristinn segi af sér þingmennsku

Stjórn ungra frjálslyndra hvetur Kristinn H. Gunnarsson, þingflokksformanna Frjálslynda flokksins, til að segja af sér þingmennsku samstundis í ljósi þess að hann hafi ítrekað sýnt vanhæfi sitt til að gegna þingstörfum fyrir flokkinn.

Fram kemur í tilkynningu ungra frjálslyndra að þeir lýsi yfir algeru vantrausti á Kristinn og saka þeir hann um að hafa ítrekað unnið gegn flokknum og reynt að afvegaleiða mikilvæg málefni sem varða þjóðarhagsmuni jafnt sem framtíð Íslendinga.

„Hvað eftir annað hefur Kristinn valið þann kost að koma í bakið á samflokksmönnum sínum og bar þar hæst tilraun hans til uppreisnar gegn varaformanni flokksins í maí síðastliðnum," segir enn fremur í tilkynningunni.

Segja ungir frjálslyndir að Kristinn hafi nú aftur farið mikinn í fjölmiðlum með svívirðilegum yfirlýsingum um störf miðstjórnar og hæfni hennar til þess að gegna því embætti sem lög flokksins kveða á um og því beri honum af segja af sér þingmennsku.

Miðstjórnin ályktaði fyrr í vikunni að Kristni bæri að segja af sér formennsku í þingflokknum en Kristinn og Guðjón Arnar Kristjánsson, formaður flokksins, segja þingflokksins að ákveða hver sé formaður hans.