Guti framlengir við Real Madrid

Miðjumaðurinn Guti hefur skrifað undir nýjan samning við Spánarmeistara Real Madrid og hér er um svokallaðan "lífstíðarsamning" að ræða. Guti verður formlega samningsbundinn Real til 2011, en fær framlengingu á hverju ári eftir það ef hann nær að spila 30 leiki á tímabili.

Guti er 31 árs gamall og bætist í hóp þriggja fastamanna félagsins sem framlengt hafa að undanförnu, en áður höfðu þeir Iker Casillas og Raul framlengt við félagið.

Guti er uppalinn hjá félaginu og byrjaði æfingar þegar hann var 8 ára gamall. Hann kom upp úr unglingaliðinu árið 1995 og hóf þá að spila með B-liðinu Castilla, en árið eftir braut hann sér leið inn í aðalliðið og hefur verið þar allar götur síðan.