Range Rover og pelsar rjúka út

Góðborgarar vestanhafs ríghalda nú um veskin, en mikið dró úr sölu á „lúxus" varningi svokölluðum í jólamánuðinum, eftir stöðuga aukningu misserin á undan. Íslendingar láta þó ekki smávægilegar efnahagskrísur hræða sig frá stórinnkaupum.

Lúxusverslanakeðjan Nordstrom greindi frá því á dögunum að sala í desember hefði verið minnst fjórum prósentum minni en í sama mánuði árið áður, á móti 8,7 prósenta söluaukningu í nóvember. Saks, sem Baugur á hlut í, reiddi litlu betur af, en sala hjá þeim jókst um 0.8% í desember frá fyrra ári. Sala í nóvembermánuði var hinsvegar heilum 25,7 prósentum meiri en sama mánuð í fyrra. Svipaða sögu er að segja af Neiman Marcus, en desembersalan hjá þeim var 2.9 prósentum meiri en árið áður.

Íslendingar virðast eiga lengra í land með að átta sig, að minnsta kosti ef skoðað er vinsælasta stöðutákn landsins - Range Rover. Andrés Jónsson, markaðsstjóri Bifreiða og landbúnaðarvéla segir ekkert hafa dregið úr sölu á bílunum. Þvert á móti hafi hún aukist.

„Árið í fyrra var metár hjá okkur. Eins og staðan er núna lítur út fyrir að sala í janúar verði meiri en í fyrra." segir Andrés, og bætir við að þegar hafi verið afhentir fjórir eða fimm nýjir Range Rover það sem af er ári. Þá er umboðið að leggja inn pöntun fyrir sérútgáfum af Range Rover bílum. Þeir bílar verða með stærri vélar og breyttir ytra sem innra. Sérútgáfurnar verða töluvert dýrari en þær sem í boði eru nú.

Karl Steingrímsson, betur þekktur sem Kalli í Pelsinum, hefur ekki fundið fyrir því að Íslendingar séu mikið að halda í við sig. „Þetta er bara mjög svipað og undanfarin ár. Við finnum lítið fyrir sveiflum í þessu", segir Karl um jólasöluna hjá Pelsinum. Hann hefur ekki miklar áhyggjur af því að kaupgleði Íslendinga fari dvínandi. „Við erum svo sérstök við Íslendingar." segir Kalli að lokum og hlær.