Iwelumo vill ólmur bæta fyrir klúðrið

Skoski landsliðsmaðurinn Chris Iwelumo segist ólmur vilja bæta fyrir mistökin sem hann gerði í sínum fyrsta landsleik í síðasta mánuði.

Iwelumo kom þá inn á sem varamaður í landsleik Skotlands og Noregs í undankeppni HM 2010 en þessi lið leika í sama riðli og Ísland. Iwelumo fékk sannkallað dauðafæri í leiknum en tókst ekki að hitta markið af afar stuttu færi. Leiknum lauk með markalausu jafntefli.

„Ég vil ólmur fá að spila annan landsleik," sagði Iwelumo. „Ég horfði á atvikið aftur í sjónvarpi en eiginkona mín skipaði mér að eyða því út af sjónvarpsupptökutækinu. Þetta var ekki skemmtilegur tími á mínum fótboltaferli en allir knattspyrnumenn þurfa að upplifa margt súrt og sætt á sínum ferli."

„Það var erfitt að horfast í augu við þetta en mér líður vel. Ég nýt þess að spila og er að skora mörk. Vonandi get ég gert slíkt hið sama fyrir landsliðið. Ég er stoltur Skoti og afar ánægður með að vera í landsliðshópnum."

Hann sagði einnig að George Burley, landsliðsþjálfari Skota, hafi sýnt sér mikinn stuðning. „Vonandi get ég endurgjaldað honum traustið."