Gunnar rekinn frá HK

Gunnari Guðmundssyni hefur verið sagt upp sem þjálfara HK en þetta kemur fram á vefsíðu félagsins. Gunnar hefur stýrt liðinu í tæp fimm ár eða frá 1. október 2003.

Það var meistaraflokksráð HK sem tók þessa ákvörðun en formaður ráðsins, Pétur Bergþór Arason, sagði við Vísi fyrir hádegi að ekki stæði til að reka Gunnar og alveg pottþétt væri að Gunnar myndi stýra næsta leik liðsins.

Tveimur tímum síðar var Gunnar síðan rekinn svo hlutirnir eru greinilega fljótir að gerast í Kópavoginum.

Fram kemur á vefsíðu HK að Gunnar var sjálfur tilbúinn til að halda áfram störfum og glíma við vandann en hafi tekið þessari niðurstöðu af sömu fagmennsku og hefur einkennt öll hans störf fyrir félagið.

Gunnar stýrði HK upp í Landsbankadeildina 2006 og náði að halda liðinu í deildinni í fyrra.