Hanna Birna: Engin ný tíðindi

„Ég bjóst aldrei við því að þetta myndi breytast á einni nóttu. Erfiðar ákvarðanir eru ekki alltaf vinsælar þegar þær eru framkvæmdar,“ sagði Hanna Birna Kristjánsdóttir, borgarstjóri, þegar Vísir leitaði eftir viðbrögðum hennar við könnun sem Capacent gerði fyrir Stöð 2 um fylgið við nýjan borgarstjórnarmeirihluta. Þar kom fram að nær 63% Reykvíkinga eru andvíg nýja meirihlutanum.

Hanna bendir á að könnunin hafi verið gerð á sama tíma og könnun Fréttablaðsins og segist ekki sjá betur en kannanirnar sýni nær sömu tölur. Báðar kannanirnar hafi einnig verið framkvæmdar áður en nýr meirihluti tók formlega við völdum.

„Það sem vekur hins vegar mesta athygli í þessari könnun er lágt svarhlutfall, sem segir okkur að það mikil hreyfing á fylginu og afstöðu fólks. Ég er því sannfærð um að þessi meirihluti muni ná góðu fylgi í borginni.“