Tvífarar: Annar er Óskar en hinn var tilnefndur

Vísir heldur áfram óvæginni tvífaraleit sinni. Skemmst er að minnast þess er Gísli Marteinn Baldursson og hinn japanski Joseph Yam voru spyrtir saman og tvífarar dagsins í dag eru ekki síður líkir - jafnvel líkari.

Það eru engir aðrir en borgarráðsformaðurinn Óskar Bergsson og stórleikarinn Willem Dafoe sem ritstjórn Vísis ruglast gjörsamlega á að þessu sinni. Óskar er fæddur árið 1961 en Dafoe 1955. Það er því skammt á milli þeirra í árum talið.

Báðir lögðu þeir stund á háskólanám, Óskar í rekstrarfræði en Dafoe í leiklist og varla þarf að fara mörgum orðum um það að störf beggja fela í sér mikil almannatengsl og samskipti. Þá má ekki gleyma því að Willem Dafoe hefur í tvígang hlotið tilnefningu til hinna nafntoguðu Óskarsverðlauna en Óskar þarf ekki að tilnefna, hann er Óskar.

Að öðru leyti látum við myndirnar tala sínu máli.