Gengið gegn slysum klukkan 16.30

Gengið verður gegn umferðarslysum í borginni í dag undir forystu heilbrigðisstarfsfólks.

Safnast verður saman við Landspítalann við Hringbraut og lagt af stað klukkan hálffimm þaðan sem gengið verður að Landspítalanum í Fossvogi með viðkomu hjá slökkviliðinu í Skógarhlíð.

Með göngunni á að votta fórnarlömbum slysa og aðstandendum þeirra samúð og stuðning og vekja almenning til umhugsunar hve slys geta haft alvarlegar og víðtækar afleiðingar. Þá vilja aðstandendur göngunnar minna á að alvarleg slys koma líka illa við alla þá sem starfs síns vegna koma þar við sögu, t.d. heilbrigðisstarfsfólk, lögreglu, slökkviliðs- og sjúkraflutningamenn, starfsmenn Landhelgisgæslunnar, presta og starfsmenn í útfararþjónustu.