Sameinuðu Þjóðirnar heiðra Sigur Rós og Björk með því að skipa þau í flokk vina Sameinuðu Þjóðanna. Tilefnið eru hinir risavöxnu náttúruverndartónleikar sem haldnir eru á morgun.

Í fréttatilkynningu frá Árna Snævari, upplýsingafulltrúi hjá Sameinuðu þjóðunum sem sér um umhverfismál á skrifstofu UNRIC í Brussel, segir að framtak íslenska tónlistarfólksins sé til fyrirmyndar.

"...og við vonumst til að samvinna okkar verði fyrsta en ekki síðasta skrefið í samvinnu um slíka vitundarvakningu," segir Árni.

Auk þess að verða vinir Sameinuðu þjóðanna munu Sigur Rós og Björk starfa náið með samtökunum að umhverfismálum. Á morgun verður opnuð heimasíðan nattura.info og einnig munu aðstandendur tónleikana og UNRIC halda myndasamkeppni fyrir ungt fólk á Norðurlöndum þar sem þemað er hlýnun jarðar.