KSÍ fékk ekki leyfi fyrir Eið Smára

Eiður Smári Guðjohnsen verður ekki með íslenska landsliðinu sem mætir Wales í vináttulandsleik á miðvikudagskvöldið.

Þetta kemur fram á vef KSÍ í dag en þar kemur fram að sambandið fékk ekki leyfi frá félagsliði Eiðs Smára, Barcelona, til að fá hann í leikinn. Þar sem leikurinn er ekki leikinn á alþjóðlegum leikdegi er Barcelona ekki skylt að sleppa Eiði Smára í leikinn.

Eiður Smári hefur átt við meiðsli að stríða undanfarnar vikur og líklegt að Barcelona vilji hlífa honum við frekari meiðslum.