Megra þarf 120 kg hund fyrir uppskurð

Stærsti hundur Bretlands er kominn í skyndimegrun eftir að ljóst varð að hann er allt of þungur til að geta gengist undir skurðaðgerð.

„Sárt ert þú leikinn Sámr fóstri ok búið svo sé til ætlat at skammt skuli okkar í meðal," sagði Gunnar á Hlíðarenda við hundinn Sám á ögurstundu. Þetta kom þó ekki til af því að Sámur skyldi gangast undir skurðaðgerð vegna slitins liðbands í vinstra afturfæti en svo er hins vegar um hinn breska Samson, 120 kílógramma stóra dan sem nær tæpum tveimur metrum þegar hann stendur á afturfótunum þótt ekki sé nema fjögurra vetra gamall.

Þetta er allt of mikið til að dýrið eigi þess nokkurn kost að jafna sig í fætinum eftir aðgerðina svo eigendurnir, hjónin Ray og Julie Woods í Lincolnskíri, eru tilneydd að megra Samson og það töluvert. Þetta verður þó ekkert áhlaupaverk þar sem blessuð skepnan hefur lifað í vellystingum og þykir fátt unaðslegra en að gæða sér á kalkúni. Sú veisla er þó búin í bili.

Nú fær Samson þurrmatinn sinn tvisvar á dag og leggst í stífa líkamsrækt þar til hann þykir hæfur til að leggjast á skurðarborðið án þess að jafna það við jörðu. Reyndar játar Julie að hún gauki nú kalkúnslæri að dýrinu svona á föstudögum. Annars væri Samson hreinlega...eins og snúið roð upp í hund.