Alvarlegum bifhjólaslysum fjölgar

Árið 2007 fórust þrír bifhjólamenn í umferðarslysum. 21 slasaðist alvarlega í fyrra samanborið við 6 árið 2003. Frá árinu 1998 hafa 10 bifhjólamenn farist í umferðarslysum. Þetta kemur fram í skýrslu Rannsóknarnefndar umferðarslysa fyrir árið 2007.

Árið 2007 fórust 15 einstaklingar í 15 banaslysum í umferðinni og er það 16 dauðsföllum færra en árið 2006. Í sex tilfellum var ökuhraðinn yfir hámarkshraða eða ekið var of greitt miðað við aðstæður.

Alls voru fjögur banaslys á Suðurlandsvegi á seinasta ári. Öll slysin voru framanákeyrslur sem hefði mátt komast hjá með aðgreiningu akstursstefna að mati rannsóknarnefndarinnar.

Að mati nefndarinnar eru líkur á að í tveimur banaslysum árið 2007 hefði hinn látni lifað slysið af ef hann hefði verið spenntur í öryggisbelti.

Algengt er á sumrin að banaslys verði í umferðinni vegna þess að ökumenn aka eftir að hafa neytt áfengis. Rannsóknarnefnd umferðarslysa varar ökumenn sérstaklega við þessari hættu sumarið 2008.

Skýrslu Rannsóknarnefndar umferðarslysa má sjá hér.