Keyrði fram af flugbraut

Karlmaður á þrítugsaldri var heppinn að sleppa með lítil meiðsl þegar hann ók bíl sínum tíu metra fram af flugbrautinni í Vestmannaeyjum í nótt.

Svo virðist sem maðurinn hafi komið bíl sínum í gegnum hlið við flugbrautina. Þar fékk hann svo útrás fyrir adrenalínþörfina með þvi að aka upp og niður brautina á miklum hraða.

Þegar hann kom að öðrum endanum náði hann hins vegar ekki að bremsa í tæka tíð og fór því eina tíu metra niður hlíð sem er við enda brautarinnar. Bíll mannsins er töluvert skemmdur en sjálfur hlaut hann ekki alvarleg meiðsli.