Framtíð Eriksson ákveðin fyrir 15. júní

Einn helsti ráðgjafi Thaksin Shinawatra, eiganda Manchester City, segir að útkljá þarf öll stærstu málin sem snerta félagið fyrir 15. júní.

Framtíð Sven-Göran Eirksson knattspyrnustjóra hefur hangið á bláþræði undanfarnar vikur en fyrir nokkru var greint frá því að hann yrði látinn fara í lok leiktíðarinnar. Hins vegar hefur ekkert fengist staðfest úr herbúðum City eftir að tímabilinu lauk í Englandi.

Þá er City einnig á höttunum eftir Ronaldinho, leikmanni Barcelona. Umræddur ráðgjafi, Pairoj Piempongsant, sagði í viðtali við fjölmiðla í heimalandi sínu að það þyrfti að ganga frá bæði máli Ronaldinho og Eriksson fyrir 15. júní.