Stjórnvöld afnemi stimpilgjöld hið snarasta

Stjórnvöld verða að grípa til aðgerða til að koma í veg fyrir hrun á fasteignamarkaði að mati skipulagshagfræðings. Hann segir að afnema verði stimpilgjöld hið snarasta.

Í kvöldfréttum Stöðvar 2 í gær var greint frá því að framboð á húsnæði hér á landi væri þrisvar sinnum meira en eðlilegt getur talist. Framboðið á markaðinum nú dugir til að mæta eftirspurn næstu 18 mánuði en þegar húsnæðiskreppan í Bandaríkjunum stóð sem hæst dugðu birgðirnar þar í landi í 10 mánuði.

Jafnframt kom fram að miðað við sömu viku í fyrra þá hefur kaupsamningum fækkað um 80 prósent milli ára hér á landi en í Bandaríkjunum var það talið hættumerki þegra kaupsamningum fækkaði um 25 prósent. Það stefnir því í verulegar lækkanir á húsnæðismarkaði hérlendis verði ekkert að gert.

Seðlabanki Íslands spáði á dögunum 30 prósent lækkun húsnæðisverðs að raungildi fram til ársins 2010 sem þýðir, gangi spáin eftir, að hækkun húsnæðisverðs á undanförnum árum gengur að mestu leyti til baka. Sigmundur Davíð Gunnlaugsson skipulagshagfræðingur segir að ef fram heldur sem horfir muni spáin ganga eftir með alvarlegum afleiðingum fyrir íslenskt efnahagslíf.