Vont að búa í borg sem setur ekki mannréttindi ofar öllu

Svandís Svavarsdóttir borgarfulltrúi og Sóley Tómasdóttir varaborgarfulltrúi Vg í borgarstjórn hafa sent frá sér yfirlýsingu vegna áforma borgarstjóra og meirihluta Sjálfstæðisflokks að afturkalla eflingu mannréttindaskrifstofu borgarinnar.

Þær segja vont að búa í borg sem setur ekki mannréttindi ofar öllu og hvetja hagsmunasamtök og borgarbúa alla til þess að mæta á borgarstjórnarfund á morgun og sýna málaflokknum samstöðu.

Hér að neðan má sjá yfirlýsinguna sem þær sendu fjölmiðlum í heild sinni:

Í ljósi þess að meirihluti Sjálfstæðisflokks og Ólafs F. Magnússonar hyggst afturkalla áform fyrri meirihluta um eflingu mannréttindaskrifstofu borgarinnar er rétt að taka eftirfarandi fram:

Á síðasta borgarstjórnarfundi síðasta kjörtímabils var ný mannréttindastefna Reykjavíkurborgar samþykkt með öllum greiddum atkvæðum og féll þar með jafnréttisstefna borgarinnar úr gildi. Markmiðið með samþykkt stefnunnar var þríþætt:

- Að útvíkka jafnréttishugtakið og tryggja félagslegan rétt og tækifæri einstaklinga óháð kynferði, fötlun, kynhneigð, aldri, heilsufari, uppruna og þjóðerni, trúarbrögðum og stjórnmálaskoðunum.

- Að samhæfa og efla starfsemi borgarinnar í málaflokki mannréttinda, m.a. með betri yfirsýn.

- Að efla frumkvæði borgarinnar í málaflokknum, m.a. með nýjum verkefnum og bættu verklagi, enda er í stefnunni kveðið á um að skrifstofa mannréttindamála eigi að stuðla að samráði og samvinnu, eiga frumkvæði að verkefnum og standa vörð um að borgarbúum sé ekki mismunað.

Í kjölfar samþykktarinnar hefði því verið eðlilegt að til viðbótar við þá starfandi jafnréttisráðgjafa yrðu ráðnir sérfræðingar í öðrum málaflokkum.

Það gerðist þó ekki í tíð meirihluta Sjálfstæðisflokks og Framsóknarflokks, heldur var ráðinn inn mannréttindaráðgjafi í stað jafnréttisráðgjafans. Mannréttindaráðgjafi sem átti að sjá um alla nýju málaflokkana til viðbótar við það sam jafnréttisráðgjafinn hafði sinnt í sínu fulla starfi.

Í tíð hundrað daga meirihlutans stóð til að bæta úr þessu. Ákveðið var að sú skrifstofa mannréttindamála sem stefnan kveður á um yrði sett á laggirnar fyrir alvöru og ráðnir yrðu inn á hana þrír starfsmenn til að byrja með.

Þó vissulega sé mikil þekking til staðar meðal starfsfólks borgarinnar á ólíkum sviðum, hefur skort á heildstæða nálgun í málaflokknum og verkefnin því oft mjög ólík eftir sviðum.

Þannig hefði skrifstofan getað kynnt og innleitt stefnuna sem í eitt og hálft ár hafði legið ofaní skúffu, auk þess sem borgin hefði getað unnið mikið frumkvöðlastarf á sviði mannréttindamála á öllum sviðum.

Meðal þess sem áformað var að gera er:

Gerð og framkvæmd aðgerðaráætlunar gegn kynbundnu ofbeldi.

Úttekt á kynbundnum launamun hjá borginni og aðgerðir í kjölfar hennar.

Fræðsluátak um áhrif staðalímynda kynjanna, innflytjenda, samkynhneigðra og fatlaðra meðal uppeldisstarfsfólks hjá borginni.

Átaks- og þróunarverkefni í tengslum við skóla án aðgreiningar, m.a. inni á frístundaheimilum.

Endurskoðun á túlkaþjónustu á vegum borgarinnar.

Endurskoðun á íslenskukennslu fyrir starfsfólk borgarinnar af erlendum uppruna.

Kynningarátak fyrir fólk sem er nýkomið til landsins í samstarfi við Alþjóðahús.

Aukið samstarf við Samtökin 78, m.a. um fræðslu fyrir starfsfólk og kynningarefni fyrir vinaborgir Reykjavíkur.

Átak í atvinnumálum fatlaðra hjá Reykjavíkurborg.

Aðgerðaráætlun um bætt aðgengi húsnæðis á vegum borgarinnar.

Jafningjafræðsla innflytjenda fyrir íslenska unglinga.

Stofnun jafnréttisskóla fyrir börn í leik- og grunnskólum að fyrirmynd náttúruskólans.

Stofnun öldungaráða í hverfum borgarinnar að fyrirmynd ungmennaráða.

…og margt margt fleira.

Áform nýs meirihluta um að halda uppteknum hætti með einn starfsmann á skrifstofu borgarstjóra í málaflokki mannréttinda hafa nú orðið til þess að eini starfsmaður skrifstofunnar hefur sagt upp störfum og hætt - án þess að nýr hafi verið ráðinn í staðinn. Áformin munu hindra að verkefnin hér að ofan og fjölmörg önnur verði að veruleika.

Áfram verður það undir frumkvæði starfsfólks á ólíkum fagsviðum komið hvort og þá hvernig verkefnin verða unnin. Borgaryfirvöld ætla ekki að axla ábyrgð á málaflokknum og telja ekki nauðsynlegt að framfylgja þeirri stefnu sem þó var samþykkt af borgarfulltrúum allra flokka.

Á morgun, þriðjudag, verður málið rætt á borgarstjórnarfundi sem hefst kl. 14.00. Fulltrúar hagsmunasamtaka og borgarbúar allir eru hvattir til að mæta á pallana og sýna málaflokknum samstöðu.Hagsmunir allra Reykvíkinga eru í húfi - enda vont að búa í borg sem ekki setur mannréttindi borgarbúa ofar öllu!

Bestu kveðjur,

Svandís Svavarsdóttir borgarfulltrúi VG

og Sóley Tómasdóttir varaborgarfulltrúi fyrrverandi formaður mannréttindaráðs