Mikil stemmning fyrir tónleikum Ratatat

Bandaríska tvíeykið Ratatat spila á eins árs afmæli viðburðafyrirtækisins Jón Jónsson ehf. 20. desember næstkomandi. Miðasala fór mjög vel af stað og er spennan greinilega mjög mikil fyrir sveitinni því þegar hafa selst tæplega tvöþúsund miðar. Tvíeykið spilar einnig á balli fyrir yngri kynslóðina þann 21. desember og hafa miðar á það selst upp á mettíma.

Ásamt Ratatat þá koma FM Belfast einnig fram og Sexy Lazer þeytir skífum ofan í mannskapinn.

Rafrænu rokksveitina Ratatat skipa þeir Mike Stroud og Evan Mast. Þeirra leiðir rákust saman þegar þeir stunduðu báðir nám við Skidmore listaháskólann í New York og gáfu fyrst út tónlist saman undir nafninu Cherry árið 2001. Heimatökin hafa yfirleitt verið hæg hjá sveitinni þar sem fyrsta breiðskífa þeirra félaga var tekin upp heima hjá Evan í gegnum kjöltutölvuna hans. Fyrsta smáskífan af henni er slagarinn "Seventeen Years" og var gefin út af útgáfufyrirtæki bróður Evan, Audio Dregs. Smáskífan barst til XL Recordings sem hefur á sínum snærum tónlistarmenn á borð við Devendra Banhart, Radiohead, Beck, Prodigy, White Stripes, Sigur Rós o.fl. Útgáfan hreifst svo að Ratatat að hún bauð henni plötusamning og hefur hún gefið út breiðskífurnar þrjár sem sveitin hefur gefið út.

Margar nafntogaðar sveitir og tónlistarmenn hafa fengið Ratatat til að "túra" með sér og má þar nefna listamenn á borð við Björk, Franz Ferdinand, Interpol, Daftpunk, CSS, The Killers, Super Furry Animals o.fl.

Einnig eru Ratatat eftirsóttir endurhljóðblandarar og hafa þeir nostrað við lög ólíkra tónlistarmanna á borð við Kanye West, Missy Elliot, The Knife, Dizzee Rascal og Television Personalities.