Mótmæla samdrætti RÚV á Vestfjörðum

Stjórn Fjórðungssambands Vestfirðinga mótmælir harðlega uppsögnum og tilheyrandi samdrætti í starfsemi svæðisstöðvar Ríkisútvarpsins á Ísafirði sem tilkynntar voru að hálfu yfirstjórnar félagsins í gær.

Í tilkynningu er bent á að svæðisútvarp fyrir Vestfirði sé mikilvægur þáttur í tengingu samfélaga á Vestfjörðum og sé einnig hluti af öryggisviðbúnaði. Þá sé hlutverk svæðisútvarpsins að gæta þess að þjóðfélagsumræða á Íslandi byggist á skoðunum allra íbúa landsins. Gildi þá ekki síst að þeir sem um svæðin fjalli búi þar og séu hluti af samfélaginu. Hér gildi hið sama um höfuðborgarsvæði sem önnur landssvæði.