Matthías: Tryggvi er meistari í þessu

Matthías Guðmundsson skoraði eina mark FH gegn Aston Villa í kvöld. „Við spiluðum ágætlega í þessum leik og hefðum átt að skora fleiri mörk að mínu mati. En þeir eru gott lið og refsa auðvitað," sagði Matthías eftir leik.

„Þeir eru með mjög snögga menn þarna í sókninni og voru okkur erfiðir. Þetta var erfitt eins og við vissum að þetta yrði," sagði Matthías sem minnkaði muninn í 3-1.

„Þetta var glæsilegt mark og sendingin frá Tryggva var frábær. Hann er náttúrulega algjör meistari í þessu. Það er allavega gaman að hafa það á ferilskránni að hafa skorað gegn Aston Villa. Maður getur sagt frá því eftir nokkur ár," sagði Matthías.

„Í seinni leiknum verðum við að leggja áherslu á að fá ekki á okkur mörk. Það fer bara í reynsluboltann að fá að upplifa það að spila á Villa Park. Það verður bara gaman."